ठाणे शहरात उंच इमारतींची संख्या झपाट्याने वाढत असताना, या इमारतींमधील लाखो नागरिकांच्या सुरक्षेची जबाबदारी सांभाळणाऱ्या अग्निशमन दलाची स्थिती मात्र अत्यंत बिकट झाली आहे. शहरात ५० ते ६० मजल्यांच्या इमारती उभ्या राहत आहेत, पण आगीच्या दुर्घटना रोखण्यासाठी आणि आपत्कालीन प्रसंगी धावून जाण्यासाठी दलाकडे पुरेसे मनुष्यबळच उपलब्ध नाही.
अग्निशमन दलातील मंजूर ८३५ पदांपैकी तब्बल ६६१ पदे रिक्त आहेत. त्यामुळे केवळ १७४ कर्मचारी संपूर्ण शहराची अग्निसुरक्षा सांभाळत आहेत. या तुटवड्यामुळे दलावर प्रचंड ताण पडत असून, प्रत्येक आगीच्या घटनेत ही कमतरता उघडपणे समोर येते.
मुंबईच्या मदतीशिवाय आग आटोक्यात येईना
रहेजा कॉम्प्लेक्समध्ये लागलेल्या आगीच्या घटनेने ही परिस्थिती पुन्हा एकदा अधोरेखित झाली. आग आटोक्यात आणण्यासाठी ठाणे अग्निशमन दलाला मुंबईतील जवानांची मदत घ्यावी लागली. उपमुख्यमंत्री एकनाथ शिंदे यांच्या उपस्थितीत मुंबई अग्निशमन दलाची अतिरिक्त कुमक मागविण्यात आली. स्वतःचे अग्निशमन दल असतानाही दुसऱ्या शहराच्या यंत्रणेवर अवलंबून राहावे लागणे, ही प्रशासनाच्या नियोजनातील उणिवा दाखवणारी बाब ठरली आहे.
महापालिकेच्या १४ अग्निशमन केंद्रांपैकी केवळ आठ केंद्रे पूर्ण क्षमतेने कार्यरत आहेत. उर्वरित केंद्रांमध्ये कर्मचाऱ्यांची कमतरता असल्याने उपलब्ध जवानांवरच कामाचा अतिरिक्त भार पडत आहे. ५० मजल्यांपेक्षा अधिक उंचीच्या इमारती शहरात उभ्या राहत असताना दलातील मोठ्या प्रमाणावरील रिक्त पदे गंभीर बाब असल्याचे नगरसेवक मनोहर डुंबरे यांनी निदर्शनास आणले.
७०८ पदांची भरती, निकाल मात्र रखडला
दरम्यान, ६०१ पदांची भरती प्रक्रिया राबविण्यात आली असून, लवकरच ही पदे भरण्यात येतील, असा विश्वास पालिका प्रशासनाने व्यक्त केला आहे. अतिरिक्त आयुक्त डॉ. नितीन राठोड यांनी भरती प्रक्रिया सुरू असल्याचे सांगत वर्षअखेरीस सुमारे ६०० कर्मचारी सेवेत दाखल होतील, असा विश्वास व्यक्त केला आहे.
होमगार्डमध्ये किमान तीन वर्षे सेवा केलेल्या आणि फायरमन पदासाठी आवश्यक पात्रता पूर्ण करणाऱ्या उमेदवारांसाठी फायरमन संवर्गात पाच टक्के समांतर आरक्षण लागू करण्यात आले आहे. त्यानुसार एकूण १९ पदे होमगार्ड उमेदवारांसाठी राखीव ठेवण्यात आली आहेत. एकूण ७०८ पदांची भरती केली जाणार आहे. यात फायरमनची ३८१, सहाय्यक फायरमनची १३ आणि चालक-यंत्रचालकांची २०७ पदे, तर अभियंता संवर्गातील १०७ पदांचा समावेश आहे.
गावदेवी मंडईतील आगीच्या घटनेनंतर रिक्त पदांचा प्रश्न महासभेत ऐरणीवर आला होता. त्यानंतर भरतीची जाहिरात प्रसिद्ध झाली आणि परीक्षा घेण्यात आली. मात्र परीक्षा होऊन तीन महिने उलटले तरी निकाल जाहीर झालेला नाही आणि मुलाखतींचे वेळापत्रकही जाहीर झालेले नाही. शिवाय मुख्य अग्निशमन अधिकारीपद अनेक वर्षांपासून रिक्त असून, उपअग्निशमन अधिकारी गिरीश झळके यांच्याकडे प्रभारी म्हणून विभागाची जबाबदारी सोपविण्यात आली आहे.
स्रोत: मूळ बातमी
Leave a Reply