सीटबेल्ट न लावल्याने अनर्थ; २२ वर्षीय गायकाचा अपघातात मृत्यू

अमेरिकेतील फ्लोरिडातून एक दुःखद बातमी समोर आली आहे. कंट्री गायक सी.जे. बीच याचा कार अपघातात मृत्यू झाला आहे. अवघ्या २२ व्या वर्षी या गायकाने जगाचा अखेरचा निरोप घेतला. ही घटना ७ नोव्हेंबर रोजी घडली. त्यांची कार रस्त्यावरून घसरून काही झाडांवर जाऊन आदळल्याने हा अनर्थ घडला.

वृत्तानुसार, अपघाताच्या वेळी सी.जे. बीच याने सीटबेल्ट लावला नव्हता. काही अहवालांनुसार त्याचा घटनास्थळीच मृत्यू झाला, तर काहींच्या मते रुग्णालयात उपचार सुरू असताना त्याचा मृत्यू झाला. सी.जे. बीच याच्या वडिलांनी फेसबुकवर पोस्ट करून त्याच्या निधनाच्या वृत्ताला दुजोरा दिला आहे. अपघाताच्या काही तास आधीच सी.जे. याने पनासिया येथील द सॉल्टी डॉन्की नावाच्या रेस्टॉरंट आणि म्युझिक वेन्यूमध्ये आपला परफॉर्मन्स सादर केला होता.

वडिलांचे आवाहन — धोक्याची सूचना देणारे दिवे बसवा

मुलाच्या निधनामुळे वडिलांना जबर धक्का बसला आहे. एका पोस्टमधून त्यांनी आपल्या भावनांना वाट मोकळी करून दिली आहे. त्यांनी लिहिले की लोक सीजेचे फोटो आणि व्हिडिओ शेअर करत आहेत, पण ते पाहूनसुद्धा आता त्यांना खूप त्रास होतो. सर्वांनी व्यक्त केलेल्या प्रेमाबद्दल आणि संवेदनांबद्दल त्यांनी मनापासून आभार मानले. तो अनेकांचा लाडका होता आणि सर्वांनाच त्याची खूप आठवण येईल, असेही त्यांनी म्हटले आहे.

आपल्या मुलाच्या आठवणींना उजाळा देतानाच त्यांनी रस्ते सुरक्षेबाबत एक विशेष विनंती केली आहे. काउंटी कमिशनर्सना फोन करा किंवा संदेश पाठवा आणि त्यांना रेविंकल रोडवरील त्या वळणाच्या दोन्ही बाजूंना धोक्याची सूचना देणारे दिवे आणि फलक बसवण्यास सांगा, असे आवाहन त्यांनी केले आहे. सीजेचा अपघात नेमक्या त्याच ठिकाणी झाला, जिथे यापूर्वीही एक अपघात घडला होता. आधीच्या अपघातानंतर तिथे पुन्हा उगवलेली झाडे-झुडपे पूर्णपणे वाढण्याआधीच पुन्हा एक दुर्घटना घडली, असेही त्याच्या वडिलांनी नमूद केले. भविष्यात अशा प्रकारच्या दुर्घटना टाळण्यासाठी त्यांनी रस्त्यावर सुरक्षा उपाययोजना आणि सूचना फलक लावण्याची मागणी केली आहे.

कोण होता सीजे बीच?

सीजे बीच हा फ्लोरिडा येथील एक गायक होता. तो एकल कलाकार म्हणून तसेच सीजे अँड द डेडमेन या आपल्या बँडसोबत परफॉर्मन्स करायचा. तो सोशल मीडियावरही खूप सक्रिय होता आणि अनेकदा स्वतःच्या संगीताचे तसेच आपल्या बँडसोबतच्या सादरीकरणांचे व्हिडिओ शेअर करत असे. डेडमेन वॉकिंग म्युझिक फेस्टिव्हल सुरू करण्यात मदत करणाऱ्या व्यक्तींपैकी सीजे हा सुद्धा एक होता. या फेस्टिव्हलमध्ये स्थानिक रहिवासी आणि विविध गायक लाइव्ह संगीताचा आनंद घेण्यासाठी एकत्र येत असत. सीजे बीचने ३ नोव्हेंबर रोजी इंस्टाग्रामवर शेवटचा व्हिडिओ शेअर केला होता, ज्यामध्ये तो त्याचे सिगारेट्स हे गाणे गाताना दिसत होता.

स्रोत: मूळ बातमी