गोकुळ दूध संस्थेच्या अध्यक्षपदाच्या निवडणुकीकडे पूर्ण राज्याचे लक्ष लागले आहे. या निवडणुकीसंदर्भातील याचिकेवर औरंगाबाद खंडपीठात सुनावणी झाली. न्यायालयाने महत्त्वपूर्ण निकाल देताना अध्यक्षपदाची निवडणूक रोखण्याबाबत कोणताही निर्णय दिला नाही. त्याचबरोबर सरकारने नियुक्त केलेल्या चार संचालकांचे मत ग्राह्य धरले जाणार असल्याचे न्यायालयाने स्पष्ट केले आहे.
## २९ सदस्य मतदान करणार
१० नोव्हेंबर रोजी गोकुळच्या अध्यक्षपदाची निवडणूक होणार आहे. निवडून आलेले २५ सदस्य आणि सरकारने नेमलेले चार सदस्य, अशा एकूण २९ सदस्य मतदान करतील. शासनाने नेमलेल्या चार सदस्यांबाबतचा अध्यादेश बरोबर आहे की चूक, हे अंतिम निकालात ठरेल. या चार संचालकांची मते वेगळी ठेवली जाणार असून त्यांची मतपत्रिका जपून ठेवल्या जाणार आहेत.
२५ सदस्यांना निवडणुकीबाबत मतदान करण्याची नोटीस यापूर्वीच देण्यात आली आहे. उर्वरित चार सदस्यांना नोटीस देण्याचा अधिकार निवडणूक निर्णय अधिकारी घेतील. कायद्याप्रमाणे त्यांना अधिकार देण्याचे आदेश न्यायालयाने दिले आहेत. त्यामुळे या चारही सदस्यांचे मतदान ग्राह्य धरले जाणार आहे.
## सतेज पाटील यांच्यापुढे आव्हान
या चार सरकारनियुक्त सदस्यांनी महायुतीच्या बाजूने मतदान केले तर सतेज पाटील यांना मोठा धक्का बसू शकतो. हे चार सदस्य महायुतीच्याच बाजूने मतदान करण्याची दाट शक्यता असल्याचे बोलले जात आहे. त्यामुळे ते चार सदस्य उद्या मतदान करणार का, याकडे सर्वांचे लक्ष लागले आहे.
दरम्यान, न्यायालयातील तसेच रस्त्यावरील लढाई सुरूच राहील, असे सतेज पाटील यांनी सांगितले आहे. त्यांनी कोल्हापुरात संघर्ष मोर्चा आयोजित केला होता. या मोर्चात हजारो शेतकरी सहभागी झाले होते.
स्रोत: मूळ बातमी
Leave a Reply