धाराशिव जिल्ह्यातील ढोकी येथील भैरवनाथ शुगर कारखान्यासमोर ऊसतोड कामगारांनी मृतदेहासह आंदोलन सुरू केलं आहे. या आंदोलनामुळे कारखाना परिसरात तणावाचं वातावरण निर्माण झालं असून, गेल्या चार तासांपासून कारखान्याचं कामकाज ठप्प आहे.
अपघातानंतर उपचारादरम्यान मृत्यू
ट्रॅक्टर चालक महादेव मुंडे यांचा ढोकी-कळंब रस्त्यावर अपघात झाला होता. अपघातानंतर त्यांना उपचारासाठी सोलापूर येथे दाखल करण्यात आलं होतं. मात्र, उपचारादरम्यान त्यांचा मृत्यू झाला. अपघातानंतर कारखाना व्यवस्थापनाने वेळीच लक्ष दिलं असतं, तर महादेव मुंडे यांचे प्राण वाचले असते, असा आरोप मृताच्या नातेवाईकांकडून करण्यात येत आहे.
चौकशी आणि न्यायाची मागणी
या प्रकरणात कारखाना व्यवस्थापनाच्या दुर्लक्षाची चौकशी करावी आणि महादेव मुंडे यांच्या कुटुंबाला न्याय मिळवून द्यावा, अशी मागणी आंदोलकांकडून करण्यात येत आहे. मृताच्या कुटुंबियांसह ऊसतोड कामगारांनी आक्रमक भूमिका घेतली असून, कारखान्याच्या गव्हाणीमध्ये बसून हे आंदोलन सुरू आहे.
आंदोलक आपल्या मागण्यांवर ठाम असून, कारखाना व्यवस्थापन आणि आंदोलकांमध्ये काय तोडगा निघतो, याकडे सर्वांचं लक्ष लागलं आहे. दरम्यान, या संपूर्ण प्रकरणामुळे शिवसेनेचे आमदार आणि माजी मंत्री तानाजी सावंत यांच्या अडचणी वाढण्याची चिन्हे दिसत आहेत, कारण हा कारखाना त्यांच्याशी संबंधित आहे.
स्रोत: मूळ बातमी
Leave a Reply