मुंबई इंडियन्सच्या कर्णधारपदी रोहित शर्मा परतणार?

मुंबई इंडियन्सने आयपीएल २०२७ साठी संघात अनेक बदल केले आहेत. त्यातच आता रोहित शर्माची कर्णधार म्हणून पुन्हा नियुक्ती होऊ शकते, अशा चर्चा सुरू झाल्या आहेत. रोहितच्या कर्णधारपदाखाली मुंबई इंडियन्सने आयपीएलमध्ये उत्कृष्ट कामगिरी केली असून संघाने पाच वेळा विजेतेपद पटकावलं आहे.

मात्र हार्दिक पांड्याच्या आगमनानंतर २०२४ मध्ये रोहित शर्माला कर्णधारपद सोडावं लागलं होतं. हार्दिकच्या काळात संघाची कामगिरी खूपच खराब राहिली. कर्णधार म्हणून हार्दिक पांड्याला अनेक मोठ्या पराभवांना सामोरं जावं लागलं आणि परिणामी संघ क्वालिफाय होऊ शकला नाही.

हार्दिकच्या जागी रोहित?

काही वृत्तांनुसार हार्दिक मुंबई सोडून दुसऱ्या फ्रँचायझीमध्ये सामील होऊ शकतो. वृत्तांनुसार हार्दिक पांड्या पंजाब किंग्स संघात सामील होऊ शकतो आणि अर्शदीप सिंग व हार्दिक पांड्याची ट्रेड डील होऊ शकते. अशा परिस्थितीत मुंबईचा पुढचा कर्णधार कोण असेल, हा प्रश्न निर्माण झाला आहे.

सध्याच्या वृत्तांनुसार संघाची सूत्रं रोहितच्या हाती दिली जाऊ शकतात. पुढच्या वर्षीच्या आयपीएलमध्ये त्याचं कर्णधार म्हणून पुनरागमन जवळपास निश्चित मानलं जात आहे. वृत्तांनुसार फ्रँचायझी १६ ते १८ नोव्हेंबर दरम्यान अधिकृत घोषणा करण्याची शक्यता आहे. अनेक दिग्गज क्रिकेटपटूंनी यापूर्वीच म्हटलं होतं की, रोहितने त्याच्या अनुभवाच्या आधारावर मुंबईचा कर्णधार बनावं.

हार्दिक पांड्याने २०२४ ते २०२६ या काळात सलग तीन हंगामांसाठी मुंबईचं कर्णधारपद भूषवलं होतं. या काळात संघाला मोठ्या उलथापालथीचा सामना करावा लागला.

मुंबईचा नवा कोचिंग स्टाफ

हार्दिकच्या ट्रेडबाबत चर्चा सुरू असतानाच मुंबई संघात मोठे बदल झाले आहेत. संघाने सहा वर्षांत एकही ट्रॉफी जिंकलेली नाही. यामुळे फ्रँचायझी एका नव्या सुरुवातीच्या शोधात आहे.

मुंबई इंडियन्सचे मुख्य प्रशिक्षक महेला जयवर्धने यांनी १७ ऑक्टोबर रोजी राजीनामा दिला. यानंतर वेस्ट इंडिजचे दिग्गज खेळाडू कायरोन पोलार्ड यांची मुख्य प्रशिक्षक म्हणून नियुक्ती करण्यात आली आहे. पोलार्ड अनेक वर्षांपासून मुंबईत कार्यरत आहेत.

याव्यतिरिक्त माजी भारतीय क्रिकेटपटू रॉबिन उथप्पा यांची फलंदाजी प्रशिक्षक म्हणून नियुक्ती करण्यात आली आहे. मिचेल मॅकक्लेनघन यांची गोलंदाजी प्रशिक्षक म्हणून, तर धवल कुलकर्णी यांची विकास गोलंदाजी प्रशिक्षक म्हणून नियुक्ती करण्यात आली आहे. टी. दिलीप यांची क्षेत्ररक्षण प्रशिक्षक म्हणून नियुक्ती करण्यात आली आहे. पोलार्ड नवीन प्रमुख झाल्याबरोबरच रोहित नवीन कर्णधार होऊ शकतो अशा अफवा पसरू लागल्या. त्यामुळे येत्या काही दिवसात याचं चित्र स्पष्ट होईल.

स्रोत: मूळ बातमी