अमेरिकेचे राष्ट्राध्यक्ष डोनाल्ड ट्रम्प यांच्या आक्रमक भूमिकेमुळे मध्यपूर्वेतील तणाव पुन्हा वाढला आहे. इराणच्या अणुकार्यक्रमाची माहिती देणाऱ्या व्यक्तीला अमेरिकेने २० दशलक्ष डॉलरचे बक्षीस जाहीर केले आहे. दरम्यान, नतान्झ अणुप्रकल्पाजवळ राहणाऱ्या नागरिकांना आयोडीनच्या गोळ्यांचे वाटप सुरू झाल्याचे वृत्त आले असून, त्यामुळे चिंता आणखी वाढली आहे.
अमेरिकेत झालेल्या मध्यावधी निवडणुकांमध्ये ट्रम्प यांच्या रिपब्लिकन पक्षाला मोठा पराभव सहन करावा लागला. ज्या टेक्सास राज्यात दशकांपासून रिपब्लिकन पक्षाचा मोठा प्रभाव आहे, तिथेही पक्षाला पराभव पत्करावा लागला. निवडून आल्यानंतर बाहेरच्या भूमीवरील युद्ध बंद करून अमेरिकेला पुन्हा महान बनवण्याचे आणि अमेरिकन नागरिकांचे जीवनमान उंचावण्याचे आश्वासन ट्रम्प यांनी दिले होते. मात्र, त्यानंतर इराणवर हल्ला करण्यात आला, असे वृत्तांत सांगतात.
मध्यावधी पराभवानंतर ट्रम्प आक्रमक?
निवडणुकीतील पराभवानंतर ट्रम्प आता सौम्य होतील की आणखी आक्रमक होतील, याकडे संपूर्ण जगाचे लक्ष लागले आहे. अमेरिकेचे निर्णय जगभरावर परिणाम करणारे असतात, त्यामुळे त्यांची पुढची भूमिका महत्त्वाची ठरणार आहे. एकीकडे इस्रायलधार्जिण्या गटांचा अमेरिकेतील प्रभाव पाहता, नेतान्याहू किंवा इस्रायली लॉबी ट्रम्प यांना इराणवर मोठा हल्ला करण्यासाठी प्रवृत्त करू शकते, अशी चर्चा आहे.
दुसरीकडे, निवडणुकीतील पराभवामुळे ट्रम्प यांचे सल्लागार आता सावध भूमिका घेण्याच्या मनस्थितीत असल्याचे बोलले जात आहे. अमेरिकेच्या बहुतांश लोकांचे असे मत झाले आहे की, अमेरिकेचे इराणसोबतचे युद्ध बेकायदेशीर आहे. त्यामुळे ट्रम्प आता कोणत्या बाजूने निर्णय घेतात, हे अजून स्पष्ट झालेले नाही. इस्रायली लॉबीचा सल्ला ऐकून ते निर्णय घेतात की स्वतःच्या सल्लागारांचे ऐकतात, याबाबत संभ्रमाचे वातावरण निर्माण झाले आहे.
इराणच्या अणुकार्यक्रमावर बक्षीस
निवडणुकीत पराभव झाल्यानंतर ट्रम्प शांत होतील, असे वाटले होते. मात्र तसे होताना दिसत नाही. लगेचच ट्रम्प यांनी इराणच्या अणुसाहित्याबाबत माहिती देणाऱ्या व्यक्तीला दोन कोटी डॉलरचे बक्षीस जाहीर केले. माहिती देणाऱ्या व्यक्तीच्या जीवाला धोका निर्माण झाल्यास तिला सुरक्षित ठिकाणी ठेवून काळजी घेतली जाईल, असेही जाहीर करण्यात आले आहे. इराणच्या अणुप्रकल्पाची खरी माहिती मिळवणे ट्रम्प यांना अत्यंत गरजेचे वाटत असल्याचे यातून दिसते.
या पार्श्वभूमीवर ब्रिक्स न्यूजने दावा केला आहे की, रशियाने इराणला गुप्तपणे काही महत्त्वाची क्षेपणास्त्रे पुरवली आहेत. तसेच इराणवर अणुहल्ला झाला तर रशिया या युद्धात उघडपणे सामील होईल, असा दावाही केला जात आहे. याचदरम्यान इराणने नतान्झ अणुभट्टीजवळ राहणाऱ्या लोकांना किरणोत्सर्गापासून वाचवण्यासाठी आयोडीनच्या गोळ्यांचे वाटप केले आहे. डोंगराखाली वर्षभर पुरेल असा अन्नसाठा आणि राहण्याची व्यवस्था केल्याचा दावाही ब्रिक्स न्यूजने केला आहे. या सर्व घडामोडी पाहून राजकीय विश्लेषक याला वादळापूर्वीची शांतता म्हणत आहेत.
स्रोत: मूळ बातमी
Leave a Reply