महाराष्ट्र लोकसेवा आयोगाने गट-क सेवा संयुक्त परीक्षेच्या परीक्षा योजनेत मोठा बदल केला आहे. या योजनेत आता २१ नव्या संवर्गांचा समावेश करण्यात आला आहे. त्यामुळे पूर्वीच्या सहा संवर्गांसह या परीक्षेची व्याप्ती आणखी वाढली आहे. याबाबतचे शुद्धिपत्रक आयोगाच्या संकेतस्थळावर प्रसिद्ध करण्यात आले आहे.
आयोगाने २० मे २०२६ रोजी गट-क सेवा संयुक्त परीक्षेची परीक्षा योजना जाहीर केली होती. त्या योजनेच्या परिच्छेद १.१ मध्ये सहा संवर्गांचा समावेश होता. त्यानंतर सामान्य प्रशासन विभागाने ५ मे २०२६ रोजी दिलेल्या निर्णयानुसार, गट-क मधील ज्या संवर्गांसाठी आयोगाकडे मागणीपत्र आले आहे, अशा २१ संवर्गांना आता या योजनेत स्थान देण्यात आले आहे. या सर्व संवर्गांची यादी परिशिष्ट क्रमांक १ मध्ये देण्यात आली आहे.
२१ नव्या संवर्गांचा समावेश
समान शैक्षणिक अर्हता असलेल्या अन्य संवर्गांसाठी पूर्व परीक्षेचा निकाल लागेपर्यंत मागणीपत्र प्राप्त झाल्यास, त्या संवर्गांचाही या परीक्षा योजनेत समावेश झाल्याचे मानले जाणार आहे. विद्यमान तसेच नव्याने समाविष्ट होणाऱ्या संवर्गांसाठी वयोमर्यादा २० मे २०२६ रोजी प्रसिद्ध झालेल्या परीक्षा योजनेतील परिच्छेद ३.२ नुसार राहणार आहे. शासनाकडून वेळोवेळी प्रसिद्ध होणाऱ्या निर्णयांनुसार त्यात बदल लागू राहतील.
निकाल प्रक्रियेत बदल
पूर्व परीक्षेच्या निकाल प्रक्रियेतही सुधारणा करण्यात आली आहे. सामान्य शैक्षणिक अर्हता असलेल्या संवर्गांसाठी उमेदवारांनी अर्जात दिलेला विकल्प आणि भरावयाच्या अराखीव व आरक्षित पदांच्या एकूण संख्येच्या आधारे मुख्य परीक्षेसाठी पात्र उमेदवारांची संख्या ठरवली जाणार आहे. त्यानुसार सामाईक पूर्व परीक्षेतील गुणांच्या आधारे एकत्रित निकाल जाहीर केला जाईल. विशिष्ट शैक्षणिक अर्हता आवश्यक असलेल्या संवर्गांसाठी मात्र स्वतंत्र निकाल जाहीर होणार आहे.
मुख्य परीक्षेच्या स्वरूपातही बदल करण्यात आला आहे. सामान्य शैक्षणिक अर्हता आवश्यक असलेल्या गट-क सेवेतील प्रशासकीय संवर्गांसाठी विहित परीक्षा योजना व अभ्यासक्रमानुसार संयुक्त मुख्य परीक्षा घेतली जाईल. विशिष्ट शैक्षणिक अर्हता आवश्यक असलेल्या तसेच नव्याने समाविष्ट करण्यात आलेल्या संवर्गांसाठी स्वतंत्र मुख्य परीक्षा आयोजित केली जाणार आहे.
एकापेक्षा अधिक संवर्गांसाठी एकच सामाईक मुख्य परीक्षा घेतली जात असल्यास, उमेदवारांकडून आवश्यकतेनुसार संवर्ग अथवा सेवेचा विकल्प आणि पसंतीक्रम घेतला जाईल. तसेच प्रतीक्षा यादीसंदर्भातील तरतुदीतही सुधारणा करण्यात आली आहे. परीक्षा योजनेतील इतर अटी व शर्तींमध्ये काही बदल झाल्यास त्याची माहिती आयोगाच्या संकेतस्थळावर वेळोवेळी प्रसिद्ध केली जाईल, असे आयोगाने प्रसिद्धी पत्रकाद्वारे कळवले आहे.
स्रोत: मूळ बातमी
Leave a Reply