हॉटेलमधून कोणत्या वस्तू फुकट घेऊन जाता येतात?

सध्या दिवाळी सुरू आहे आणि दिवाळीनंतर अनेकांचा फिरण्याचा बेत असतो. घरापासून दूर फिरायला गेल्यावर सर्वांत आधी हॉटेल बुक केले जाते, जेणेकरून फिरून झाल्यावर आराम करता येईल. हॉटेलच्या खोलीत गेल्यावर काही आकर्षक वस्तू दिसतात आणि त्या घरी घेऊन जाण्याची इच्छा अनेकांना होते. मात्र खोलीतील प्रत्येक वस्तू घरी नेता येत नाही, हे लक्षात ठेवणे गरजेचे आहे.

कोणत्या वस्तू मोफत घेऊन जाता येतात

हॉटेलच्या खोलीत ठेवलेल्या काही छोट्या वस्तू तुम्ही घरी घेऊन जाऊ शकता. बाथरूममधील शॅम्पू, कंडिशनर, लोशन आणि साबण यांसारख्या वस्तू नेण्यास परवानगी असते. तसेच वैयक्तिक वापरासाठी ठेवलेल्या वस्तू, जसे की टूथब्रश, टूथपेस्ट, रेझर आणि कंगवा, घेतल्यास कोणीही प्रश्न विचारत नाही. बहुतेक आलिशान हॉटेल्समध्ये वापरून फेकून देण्याच्या चपला ठेवल्या जातात. तुम्ही वापरलेली चप्पल चेक-आउटनंतर फेकून दिली जाते, त्यामुळे ती घरी घेऊन जाण्याचा पर्याय तुमच्याकडे असतो. याशिवाय खोलीत ठेवलेल्या पिण्याच्या पाण्याच्या सीलबंद बाटल्या, टी बॅग्ज, कॉफी आणि साखरेची पाकिटे, तसेच हॉट चॉकलेटची पाकिटेही तुम्ही सोबत घेऊ शकता. हॉटेलचा लोगो असलेले नोटपॅड, पेन आणि पेन्सिलही घेण्यास हरकत नसते. यातील अनेक वस्तू तुमच्या वापरण्यानंतर फेकून दिल्या जातात, त्यामुळे त्या खोलीत ठेवून जाणे किंवा घरी घेऊन जाणे तुमच्या हाती असते.

कोणत्या वस्तू घेऊन जाऊ नयेत

हॉटेलच्या खोलीतील हेअर ड्रायर, उशा, पडदे आणि दिवे दिसायला आकर्षक असले, तरी त्या वस्तू तुम्ही मोफत घरी नेऊ शकत नाही. या वस्तू नेताना पकडले गेल्यास त्या व्यक्तीवर कायदेशीर कारवाई केली जाते आणि दंडही आकारला जातो. काही लोकांना हॉटेलमध्ये आकर्षक दिसणारी प्रत्येक गोष्ट हवी असते आणि ते ती उघडपणे मागतात. इतकेच नाही, तर काही लोक कोणालाही न सांगता हॉटेलच्या खोलीतून वस्तू घेतात. मात्र वैयक्तिक किट, शॅम्पू, कंडिशनर, साबण, चहा आणि कॉफीचे साहित्य यांसारख्या वस्तूच घरी नेण्यास परवानगी आहे, हे लक्षात ठेवावे.

स्रोत: मूळ बातमी