महाराष्ट्र लोकसेवा आयोगामार्फत घेण्यात आलेल्या नऊ स्पर्धा परीक्षांमधील प्रश्नपत्रिका तसेच उत्तरतालिका फुटल्याच्या कथित प्रकरणांची सखोल चौकशी करण्यासाठी राज्य शासनाने चौकशी आयोगाची नियुक्ती केली आहे. या प्रकरणांशी संबंधित माहिती, पुरावे किंवा तक्रारी असलेल्या व्यक्तींना आपली निवेदने आयोगाने निश्चित केलेल्या विहित प्रतिज्ञापत्राच्या नमुन्यातच सादर करणे आवश्यक आहे, असे आवाहन महाराष्ट्र लोकसेवा आयोग परीक्षा चौकशी आयोगाने केले आहे.
संबंधित परीक्षार्थी, विद्यार्थी, व्यक्ती तसेच नोंदणीकृत संस्थांनी आपली निवेदने १६ नोव्हेंबर २०२६ पर्यंत प्रतिज्ञापत्राद्वारे सादर करावीत. निवेदन सादर करण्यात सुस्पष्टता राहावी यासाठी आयोगाने प्रतिज्ञापत्राचा निश्चित नमुना उपलब्ध करून दिला आहे. त्यानुसार संबंधितांनी आपली निवेदने मराठी किंवा इंग्रजी भाषेत नोटरीकृत प्रतिज्ञापत्रासोबत आयोगाकडे सादर करणे आवश्यक आहे.
निवेदन कुठे आणि कसे सादर करावे
या चौकशी आयोगाचे कार्यालय वांद्रे-कुर्ला संकुलातील अन्न व औषध प्रशासन भवनाच्या दुसऱ्या मजल्यावरील दालन क्रमांक २०१ येथे सुरू करण्यात आले आहे. कार्यालयाचा पत्ता असा आहे: अन्न व औषध प्रशासन भवन, दालन क्र. २०१, दुसरा मजला, बीकेसी, वांद्रे (पूर्व), मुंबई-५१. या पत्त्यावर प्रत्यक्ष किंवा कुरिअरद्वारेही निवेदन सादर करता येणार आहे.
निवेदनासोबत वैध ओळखपत्राची प्रत तसेच संबंधित कागदपत्रांच्या स्वसाक्षांकित प्रती जोडाव्यात. याशिवाय नोटरीकृत प्रतिज्ञापत्र, निवेदन आणि संबंधित कागदपत्रांची एक प्रत आयोगाच्या complaints.inquirycomm.mpsc@maharashtra.gov.in या ई-मेलवरही पाठवावी, असे आवाहन करण्यात आले आहे.
३० ऑक्टोबरच्या सूचनेनुसार निवेदने मागवली
३० ऑक्टोबरला प्रसिद्ध केलेल्या सूचनेनुसार ही निवेदने मागविण्यात आली आहेत. तक्रारी दाखल करण्यासंदर्भात आवश्यक माहिती किंवा मदतीसाठी ०२२-२०८६७६७७ या दूरध्वनी क्रमांकावर संपर्क साधावा, असे आवाहन महाराष्ट्र लोकसेवा आयोग परीक्षा चौकशी आयोगाचे सदस्य सचिव तुकाराम मुंढे यांनी प्रसिद्धी पत्रकाद्वारे कळविले आहे.
मेल, पोस्ट किंवा प्रत्यक्ष भेटीद्वारेही तक्रार करता येणार असल्याचे आयोगाने स्पष्ट केले आहे. संबंधितांनी विहित नमुन्यातील प्रतिज्ञापत्रासह आपले निवेदन वेळेत सादर करावे, असे आवाहन आयोगाकडून करण्यात आले आहे.
स्रोत: मूळ बातमी
Leave a Reply