दिवाळीच्या सणासाठी गावी जाणाऱ्या प्रवाशांची मुंबईतील रेल्वे स्थानकांवर मोठी गर्दी होत आहे. दिवाळीसोबतच उत्तर भारतातील मोठा सण असलेल्या छठपुजेसाठीही परप्रांतीय नागरिक आपापल्या गावी परतत आहेत. या गर्दीवर नियंत्रण ठेवण्यासाठी मध्य रेल्वेने मोठा निर्णय घेतला आहे. मुंबईतील पाच प्रमुख रेल्वे स्थानकांवर प्लॅटफॉर्म तिकीट विक्री बंद करण्यात आली आहे.
कोणत्या स्थानकांवर बंदी?
मध्य रेल्वेच्या निर्णयानुसार छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे आणि कल्याण या पाच स्थानकांवर प्लॅटफॉर्म तिकीट विक्री बंद राहणार आहे. पाच नोव्हेंबरपासून १५ नोव्हेंबरपर्यंत ही विक्री बंद राहणार असल्याचे रेल्वेने स्पष्ट केले आहे. या काळात केवळ अधिकृत रेल्वे तिकीट असणाऱ्या प्रवाशांनाच प्लॅटफॉर्मवर प्रवेश दिला जाणार आहे.
कोणाला मिळणार सूट?
सुरक्षेच्या कारणामुळे हा कडक नियम केला असला तरी काही गरजू प्रवाशांच्या मदतीसाठी येणाऱ्या नातेवाईकांना यातून सूट देण्यात येणार आहे. ज्येष्ठ नागरिकांना सोडायला किंवा घ्यायला येणारे नातेवाईक, आजारी प्रवाशांच्या मदतीला येणारे नातेवाईक, छोट्या मुलांसोबत प्रवास करणाऱ्या प्रवाशांचे नातेवाईक तसेच महिला प्रवाशांसोबत येणारे नातेवाईक यांना ही सूट मिळणार आहे.
दिवाळी आणि छठपुजेसाठी मुंबईत राहणारे नागरिक गावाकडे जात असल्याने उत्तर भारत, बिहार आणि पूर्व उत्तर प्रदेशकडे जाणाऱ्या गाड्यांमध्ये प्रचंड गर्दी असते. अशावेळी प्लॅटफॉर्मवर केवळ प्रवास करणारे प्रवाशीच उपस्थित राहतील आणि चेंगराचेंगरी किंवा इतर कोणतीही दुर्घटना टाळता येईल, यासाठी हे पाऊल उचलण्यात आले आहे. प्रवाशांनी आपल्या गाडीच्या वेळेत स्थानकावर पोहोचावे आणि गैरसोय टाळण्यासाठी नियमांचे काटेकोरपणे पालन करावे, असे आवाहन रेल्वेने केले आहे.
स्रोत: मूळ बातमी
Leave a Reply