देशाचे पहिले गृहमंत्री सरदार वल्लभभाई पटेल यांच्या जयंतीनिमित्त भुसावळसह विभागात राष्ट्रीय एकता दिवस नुकताच उत्साहात साजरा करण्यात आला. यानिमित्ताने ‘रन फॉर युनिटी’ रॅलीचे आयोजन करण्यात आले होते.
या रॅलीत रेल्वेचे अधिकारी, कर्मचारी, रेल्वे शाळेतील शिक्षक, विद्यार्थी आणि रेल्वे सुरक्षा दलाचे जवान उत्स्फूर्तपणे सहभागी झाले.
विभागीय रेल्वे व्यवस्थापक कार्यालयापासून प्रारंभ
या रॅलीचे नेतृत्व अपर मंडल रेल्वे व्यवस्थापक (प्रशासन) प्रवीण कुमार पाठक आणि अपर मंडल रेल्वे व्यवस्थापक (तांत्रिक) एम. के. मीना यांच्या मार्गदर्शनात करण्यात आले. ही रॅली विभागीय रेल्वे व्यवस्थापक कार्यालयाच्या परिसरातून सुरू होऊन भुसावळ रेल्वेस्थानकाच्या उत्तर दिशेला येऊन तिचा समारोप झाला.
एकता, अखंडता आणि सुरक्षेची शपथ
या कार्यक्रमाच्या अनुषंगाने ‘डीआरएम’ कार्यालयाच्या प्रांगणात अपर मंडल रेल्वे व्यवस्थापक (प्रशासन) प्रवीण कुमार पाठक यांनी उपस्थित सर्व अधिकारी व कर्मचाऱ्यांना राष्ट्रीय एकता, अखंडता आणि सुरक्षेचे रक्षण करण्याची शपथ दिली.
यावेळी सर्व विभागांचे अधिकारी व कर्मचारी, रेल्वे शाळेतील शिक्षक आणि विद्यार्थी मोठ्या संख्येने उपस्थित होते. सर्वांनी एकमुखाने देशाची एकता, अखंडता आणि बंधुभाव कायम राखण्याचा संकल्प व्यक्त केला. रेल्वे कर्मचारी आणि विद्यार्थ्यांनी ‘एक भारत, श्रेष्ठ भारत’ या घोषणांनी परिसर दुमदुमून टाकत राष्ट्रीय एकता, ऐक्य आणि सामाजिक सलोख्याचा संदेश दिला.
स्रोत: मूळ बातमी
Leave a Reply