दिवाळी सणाच्या पार्श्वभूमीवर जळगाव येथील मुलांचे निरीक्षणगृह आणि बालगृहातील मुला-मुलींनी तयार केलेल्या पर्यावरणपूरक कापडी आकाशकंदील व पणत्यांच्या प्रदर्शनी आणि विक्री स्टॉलचे उद्घाटन झाले. जिल्हाधिकारी रोहन घुगे यांच्या हस्ते फित कापून या स्टॉलची सुरुवात करण्यात आली. हा उपक्रम जिल्हा परिविक्षा आणि अनुरक्षण संघटना संचलित संस्थेत राबवण्यात येत आहे.
उद्घाटनानंतर जिल्हाधिकाऱ्यांनी स्टॉलवरील प्रत्येक आकाशकंदील आवडीने पाहिला आणि बालकांशी संवाद साधून त्यांचे कौतुक केले. बालगृहातील मुलांमध्ये प्रचंड सुप्त गुण आणि कौशल्य दडलेले आहे, असे मत त्यांनी व्यक्त केले. मुलांनी तयार केलेले कापडी आकाशकंदील आणि पणत्या अत्यंत आकर्षक असून व्यावसायिक दर्जाचे आहेत, असेही ते म्हणाले.
कला आणि व्यवसाय शिक्षिकांचे मार्गदर्शन
अधीक्षक रविकिरण अहिरराव यांच्या विशेष प्रयत्नांतून हा उपक्रम साकार झाला आहे. पूर्णपणे कापडी आणि पर्यावरणपूरक साहित्याचा वापर करून ही उत्पादने तयार करण्यात आली आहेत. कला व व्यवसाय शिक्षिका शोभना डोळे यांनी मुलांना या कामात मार्गदर्शन केले. मुला-मुलींच्या कौशल्यगुणांना आणि कल्पकतेला चालना देणे हा या उपक्रमामागील उद्देश आहे.
स्वावलंबनाची भावना निर्माण होणे कौतुकास्पद
दिवाळीनिमित्त बालकांमध्ये स्वावलंबनाची भावना निर्माण होणे ही अत्यंत कौतुकास्पद बाब असल्याचे जिल्हाधिकाऱ्यांनी नमूद केले. बालकांच्या प्रयत्नांचे कौतुक करून त्यांचे मनोबल वाढवण्यासाठी आणि त्यांच्यात उत्साह निर्माण करण्यासाठी जळगावकर नागरिकांनी बालकांनी तयार केलेले पर्यावरणपूरक आकाशकंदील खरेदी करावेत, असे आवाहन करण्यात आले आहे. या खरेदीतून मुलांच्या हाताला हक्काची बाजारपेठ मिळणार आहे.
स्रोत: मूळ बातमी
Leave a Reply