नंदुरबारमध्ये दोन महिन्यांत २६ लाखांचा भेसळयुक्त साठा जप्त

दिवाळीच्या पार्श्वभूमीवर अन्न व औषध प्रशासनाने नंदुरबार जिल्ह्यातील मिठाई व नमकीन विक्री करणाऱ्या आस्थापनांची विशेष तपासणी मोहीम राबवली. १ सप्टेंबर ते २ नोव्हेंबर या दोन महिन्यांच्या कालावधीत केलेल्या या कारवाईत भेसळयुक्त असल्याचा संशय असलेला २६ लाख ४१ हजार ९९ रुपये किमतीचा एकूण तीन हजार ४८० किलो माल जप्त करण्यात आला आहे.

या कालावधीत जिल्ह्यातील एकूण ६७ आस्थापनांची तपासणी करण्यात आली. यापैकी ३१ आस्थापनांना नोटिसा बजावण्यात आल्या असून ९ आस्थापनांचे परवाने निलंबित करण्यात आले आहेत. तसेच ८ आस्थापनांवर दंडात्मक कारवाई करण्यात आली असून तपासणीसाठी एकूण ८२ नमुने घेण्यात आले आहेत. जप्त केलेल्या साठ्यामध्ये प्रामुख्याने मसाले, खाद्यतेल, नमकीन आणि मिठाईचा समावेश आहे.

नमुने प्रयोगशाळेत; अहवालानंतर पुढील कारवाई

या पदार्थांचे नमुने विश्लेषणासाठी प्रयोगशाळेत पाठवण्यात आले असून अहवाल मिळाल्यानंतर अन्न सुरक्षा व मानके कायद्यानुसार संबंधितांविरुद्ध पुढील कारवाई करण्यात येणार आहे. ही कारवाई नंदुरबार कार्यालयाच्या सहायक आयुक्तांच्या मार्गदर्शनाखाली अन्न सुरक्षा अधिकाऱ्यांनी पार पाडली.

अन्नपदार्थांमध्ये भेसळ करू नये आणि कोणत्याही प्रकारचा सिंथेटिक रंग वापरू नये, असे प्रशासनाने स्पष्ट केले आहे. मिठाईमध्ये रंगाचे प्रमाण मर्यादित असावे तसेच हॉटेल व्यावसायिकांनी तळण्यासाठी वारंवार तेच तेल वापरू नये, असा सल्लाही देण्यात आला आहे. नियमांचे उल्लंघन झाल्यास दोषींवर कठोर कारवाई केली जाईल. दिवाळीनिमित्त स्टॉलवर विक्री करणाऱ्या सर्व विक्रेत्यांना अन्न नोंदणी किंवा परवाना घेणे बंधनकारक असल्याचेही प्रशासनाकडून स्पष्ट करण्यात आले आहे. नागरिकांनी कोणतीही शंका किंवा तक्रार असल्यास अन्न व औषध प्रशासनाच्या नंदुरबार कार्यालयाशी संपर्क साधावा, असे आवाहनही करण्यात आले आहे.

स्रोत: मूळ बातमी