उल्हासनगर: सुभाष टेकडीत दूषित पाणी, नागरिकांना उलट्या-जुलाबाचा त्रास

उल्हासनगर कॅम्प क्रमांक ४ मधील सुभाष टेकडी परिसरात गेल्या काही दिवसांपासून पाणीपुरवठ्याचा गंभीर प्रश्न निर्माण झाला आहे. नळाला दोन ते तीन दिवसांआड पाणी येते आणि तेही गढूळ व दुर्गंधीयुक्त असते. या पाण्याच्या वापरामुळे काही नागरिकांना खोकला, उलट्या आणि जुलाबाचा त्रास होऊ लागला असून परिसरात भीतीचे वातावरण आहे.

महानगरपालिकेने बसवलेल्या बोअरवेलची दुरवस्था झाली असून नियमित पाणीपुरवठा होत नसल्याने पिण्याच्या पाण्यासाठी नागरिकांना भटकंती करावी लागते. दोन-तीन दिवसांनंतर नळाला पाणी आले की ते साठवून ठेवण्याशिवाय नागरिकांकडे पर्याय राहत नाही. मात्र नळातून येणारे पाणी गढूळ रंगाचे असून त्यातून प्रचंड दुर्गंधी येत असल्याचे नागरिकांचे म्हणणे आहे.

उकळूनही दुर्गंधी जात नाही

हे पाणी उकळून घेतल्यानंतरही त्याची दुर्गंधी जात नसल्याची तक्रार नागरिकांनी केली आहे. असे पाणी वापरण्याची वेळ आल्याने आरोग्याचा प्रश्न निर्माण झाला आहे. काही नागरिकांना उलट्या, जुलाब, घशाचा त्रास आणि खोकल्याच्या तक्रारी जाणवत असल्याचे सांगण्यात येत आहे. त्यामुळे सुभाष टेकडी परिसरातील रहिवाशांमध्ये भीती आणि संतापाचे वातावरण आहे.

तपासणी आणि आंदोलनाचा इशारा

या प्रश्नावर समाजसेवक संजय वाघमारे यांनी तीव्र नाराजी व्यक्त केली आहे. सुभाष टेकडी परिसरात येणारे गढूळ आणि दुर्गंधीयुक्त पाणी पिण्यासाठी तर सोडाच, घरगुती वापरासाठीही योग्य नाही, असे त्यांचे म्हणणे आहे. या पाण्याला सडलेल्या माशाप्रमाणे भयंकर दुर्गंधी येत असल्याचे त्यांनी म्हटले आहे.

स्वच्छ आणि मुबलक पाणी उपलब्ध करून देणे ही महापालिकेची प्राथमिक जबाबदारी असल्याचे सांगत, सुभाष टेकडी परिसरातील पाणीपुरवठ्याची तातडीने तपासणी करून पाण्याचे नमुने प्रयोगशाळेत तपासावेत, अशी मागणी त्यांनी केली आहे. महापालिकेने तातडीने पाणीप्रश्न सोडवला नाही, तर परिसरातील नागरिकांना एकत्र करून तीव्र आंदोलन छेडण्यात येईल, असा इशाराही त्यांनी दिला आहे. यासंदर्भात पाणीपुरवठा विभागाचे कार्यकारी अभियंता अशोक घुले यांच्याशी संपर्क साधला असता, काही तांत्रिक बाबींमुळे दूषित पाणी येत असून संबंधित यंत्रणेला पत्रव्यवहार करण्यात आल्याचे त्यांनी सांगितले.

स्रोत: मूळ बातमी