नागपूर शहरातील गोधनी रोडवर मंगळवारी सायंकाळी भीषण अपघात झाला. भरधाव वेगाने आलेल्या टिप्परने दुचाकीवरून जाणाऱ्या कुटुंबाला मागून जोरदार धडक दिली. या अपघातात ज्योती पंकज फलके (वय ३०) यांचा जागीच मृत्यू झाला, तर त्यांच्यासोबत असलेला चिमुकला मुलगा जखमी झाला. मानकापूर पोलीस ठाण्याच्या हद्दीतील गारवा बिर्याणी सेंटरसमोर सायंकाळी साडेचारच्या सुमारास ही घटना घडली.
मिळालेल्या माहितीनुसार, ज्योती फलके या पती आणि मुलासोबत दुचाकीने गोधनी रोडवरून जात होत्या. मागून आलेल्या टिप्परने त्यांच्या दुचाकीला धडक दिल्यानंतर तिघेही रस्त्यावर फेकले गेले. याचवेळी टिप्परचे चाक ज्योती यांच्या डोक्यावरून गेल्याने त्यांचा घटनास्थळीच मृत्यू झाला. जखमी मुलाला तातडीने रुग्णालयात दाखल करण्यात आले.
रस्त्याच्या दुरवस्थेविरोधात नागरिकांचा रास्ता रोको
या घटनेनंतर परिसरात संतापाचे वातावरण निर्माण झाले. अवघ्या २० दिवसांपूर्वी याच गोधनी रोडवर झालेल्या अपघातात एका तरुणीचा मृत्यू झाला होता. त्यानंतरही रस्त्याच्या समस्यांवर उपाययोजना न झाल्याने संतप्त नागरिकांनी गोधनी रोडवर रास्ता रोको आंदोलन सुरू केले. तब्बल चार तास वाहतूक ठप्प झाल्याने वाहनांच्या लांबच लांब रांगा लागल्या होत्या. गोधनी रोडवर अनेक ठिकाणी मोठमोठे खड्डे पडले असून, वारंवार खोदकाम केले जाते आणि रस्त्याच्या कडेला झालेल्या अतिक्रमणामुळे वाहतुकीला अडथळे निर्माण होतात, असा आरोप नागरिकांनी केला.
पोलिसांचे आश्वासन, आंदोलन मागे
आंदोलनाची माहिती मिळताच पोलीस आणि वाहतूक विभागाचे वरिष्ठ अधिकारी घटनास्थळी दाखल झाले. अतिरिक्त पोलीस आयुक्त विनिता शाहू, डीसीपी रमेश धुमाळ, वाहतूक विभागाचे डीसीपी आदित्य मिर्खेलकर आणि मानकापूर विभागाच्या डीसीपी अन्नपूर्णा सिंह यांच्यासह वरिष्ठ अधिकाऱ्यांनी आंदोलकांशी चर्चा केली. यावेळी महापालिकेच्या मुख्य अभियंत्यांनी रस्त्यावरील अतिक्रमण रातोरात हटविण्याचे निर्देश दिले. नागरिकांच्या मागण्यांवर आवश्यक कार्यवाही करण्याचे आश्वासन मिळाल्यानंतर नागरिकांनी आंदोलन मागे घेतले आणि गोधनी रोडवरील वाहतूक पुन्हा सुरू झाली. दरम्यान, अपघातप्रकरणी मानकापूर पोलिसांनी टिप्पर चालकाविरोधात पुढील तपास सुरू केला आहे.
स्रोत: मूळ बातमी
Leave a Reply