माण-हिंजवडी ते शिवाजीनगर या मेट्रो मार्गाचे तीन नोव्हेंबर २०२६ रोजी उद्घाटन झाले. पण या क्षणापर्यंत पोहोचण्यासाठी या प्रकल्पाने सुमारे नऊ वर्षांचा प्रदीर्घ प्रवास केला आहे. धोरणात्मक निर्णयापासून ते बांधकाम, चाचण्या आणि सुरक्षा मंजुऱ्यांपर्यंत अनेक टप्पे या प्रकल्पाने पार केले.
प्रकल्पाची सुरुवात आणि मंजुऱ्या
२०१७ मध्ये केंद्र सरकारच्या नवीन मेट्रो रेल धोरणाअंतर्गत सार्वजनिक-खासगी भागीदारी तत्त्वावर हा प्रकल्प राबविण्याचा निर्णय झाला. २०१८ मध्ये राज्य मंत्रिमंडळाने त्याला मंजुरी दिली. त्याच वर्षी ऑक्टोबरमध्ये पुणे महानगर प्रदेश विकास प्राधिकरणाने सार्वजनिक-खासगी भागीदारी मॉडेलअंतर्गत टाटा व सिमेन्ससह २३.३ किलोमीटर प्रकल्पाचे कंत्राट मंजूर केले आणि यासाठी पुणे आयटी सिटी मेट्रो रेल लिमिटेड ही विशेष कंपनी स्थापन झाली. डिसेंबर २०१८ मध्ये पंतप्रधान नरेंद्र मोदी यांच्या हस्ते बालेवाडी येथील श्री शिवछत्रपती शिवाजी महाराज क्रीडा संकुलात भूमिपूजन झाले. सप्टेंबर २०१९ मध्ये प्राधिकरण आणि कंपनी यांच्यात करारावर स्वाक्षऱ्या झाल्या.
अडथळे आणि शेवटचा टप्पा
२०२०-२१ या कोरोना काळात हिंजवडी व शिवाजीनगर भागातील भूसंपादन आणि सरकारी जागा हस्तांतरणातील अडचणींमुळे कामाची गती काहीशी मंदावली. नोव्हेंबर २०२१ मध्ये केंद्र सरकारच्या सशक्त समितीच्या बैठकीत प्रकल्पाला कमाल २० टक्के आर्थिक सहाय्य देण्यासाठी अंतिम मान्यता देण्याची शिफारस झाली. प्रकल्पासाठी आवश्यक ९० टक्क्यांपेक्षा जास्त भूसंपादन आणि तांत्रिक परवानग्या पूर्ण झाल्यानंतर प्रत्यक्ष बांधकाम सुरू झाले. सुरुवातीला ४० महिन्यांची, म्हणजे मार्च २०२५ पर्यंतची मुदत निश्चित होती. नोव्हेंबर २०२२ मध्ये त्रिपक्षीय करारावर स्वाक्षरी झाली. बांधकामादरम्यान आलेल्या तांत्रिक अडचणी आणि वाहतूक बदलांमुळे फेब्रुवारी २०२५ मध्ये मेट्रो सवलतधारकाने ५४३ दिवसांच्या मुदतवाढीचा प्रस्ताव सादर केला आणि जून २०२५ मध्ये काम पूर्ण करण्यासाठी ३१ मार्च २०२६ पर्यंत मुदतवाढ मंजूर झाली. जानेवारी २०२६ मध्ये माण डेपो आणि उन्नत मार्गावर गाड्यांच्या तांत्रिक व सुरक्षा चाचण्या यशस्वी झाल्या. जुलै २०२६ मध्ये मेट्रो रेल्वे सुरक्षा आयुक्तांकडून माण ते बालेवाडी दरम्यानच्या पहिल्या १२ स्थानकांना तात्पुरती सुरक्षा मंजुरी मिळाली. ऑक्टोबर २०२६ मध्ये उर्वरित मार्गावरील तपासणी पूर्ण होऊन जिल्हा न्यायालय ते शिवाजीनगर जोडणाऱ्या आणखी पाच स्थानकांना सुरक्षा प्रमाणपत्र मिळाले. त्यामुळे २३ पैकी १७ स्थानके प्रवाशांसाठी पूर्णपणे सज्ज झाली. अखेर तीन नोव्हेंबर २०२६ रोजी पंतप्रधानांच्या हस्ते ऑनलाइन उद्घाटन झाले आणि मुख्यमंत्री देवेंद्र फडणवीस यांनी मेट्रोतून प्रवास केला.
स्रोत: मूळ बातमी
Leave a Reply