पुणे शहरात वाहनांची संख्या झपाट्याने वाढत असून पार्किंगची समस्या दिवसेंदिवस गंभीर होत चालली आहे. या परिस्थितीचा गैरफायदा घेत नागरिकांकडून ठरवलेल्या दरापेक्षा कित्येक पट जास्त पैसे वसूल केले जात असल्याचा धक्कादायक प्रकार समोर आला आहे. पुणे महापालिकेने निश्चित केलेले अधिकृत दर आणि प्रत्यक्षात ठेकेदारांकडून घेतली जाणारी रक्कम यामध्ये प्रचंड तफावत असल्याचे आढावा घेताना दिसून आले आहे.
अधिकृत दर विरुद्ध प्रत्यक्ष वसुली
महापालिकेच्या पार्किंगसह शहरातील प्रमुख पार्किंग ठिकाणांचा आढावा घेतला असता, १४ रुपयांच्या पार्किंगसाठी तब्बल ६० रुपये नागरिकांकडून घेतले जात असल्याचे समोर आले. काही ठिकाणी ३ रुपयांच्या पार्किंगसाठी थेट ३० रुपये आकारले जातात. चारचाकी वाहनांसाठी १४ रुपयांऐवजी ६० रुपयांची वसुली होते, तर काही वाहनतळांवर १०० रुपयांपर्यंत दर आकारले जातात. अनेक पार्किंग ठिकाणी दरपत्रकच लावलेले नसते आणि पावती मागितल्यावरच दिली जाते. तसेच अनेक ठिकाणी ऑनलाइन पेमेंटची सुविधाही उपलब्ध नाही. ठेकेदारांच्या या मनमानीवर महापालिकेचे कोणतेही प्रभावी नियंत्रण नसल्याचे चित्र आहे.
नागरिकांची मागणी
महापालिकेने पार्किंगचे ठेके दिले असले, तरी ठेकेदार वाहनतळांवर दरपत्रक लावत नाहीत आणि पावतीवर घेतलेल्या पैशांची नोंदही नसते, अशी तक्रार आहे. त्यामुळे नागरिकांची ही लूट तातडीने थांबवावी, अशी मागणी वेगवेगळ्या संघटनांकडून केली जात आहे. दुसरीकडे, नागरिकांकडून जादा पैसे घेतले जात नसल्याचा दावा पार्किंग व्यवस्थापकांकडून करण्यात आला आहे. एकीकडे पुणेकर महापालिकेला विविध प्रकारचे कर आणि शुल्क भरतात, मात्र पार्किंगसारख्या मूलभूत सुविधेसाठीही त्यांची आर्थिक लूट होत असेल, तर याला जबाबदार कोण, असा प्रश्न उपस्थित होत आहे. महापालिकेच्या नाकाखाली सुरू असलेली ही वसुली थांबणार का, याकडे पुणेकरांचे लक्ष लागले आहे.
स्रोत: मूळ बातमी
Leave a Reply