सिन्नर नगर परिषदेच्या सर्वसाधारण बैठकीत भाजीबाजाराच्या ठेक्यात ५० टक्क्यांपर्यंत घट आणण्याचा प्रयत्न करण्याचा निर्णय घेण्यात आला. शेतकऱ्यांच्या हितासाठी भाजीबाजारातील वसुलीवर नियंत्रण आणणे हा या निर्णयामागील उद्देश आहे. या बैठकीत एकूण १४० विषयांना मंजुरी देण्यात आली.
नगराध्यक्ष विठ्ठल उगले यांच्या अध्यक्षतेखाली ही बैठक झाली. त्यावेळी मुख्याधिकारी अभिजित कदम, उपनगराध्यक्ष हर्षद देशमुख, विविध सभापती, नगरसेवक आणि विभागांचे अधिकारी उपस्थित होते. नगरसेवक पंकज जाधव यांनी शेतकऱ्यांच्या भाजीबाजार ठेक्याचा विषय उपस्थित केला. शेतकऱ्यांवर आर्थिक भार पडू नये, यासाठी ठेका ५० टक्क्यांपर्यंत कमी करण्याची मागणी त्यांनी केली. त्यावर सकारात्मक निर्णय घेण्याचे ठरले.
बैठकीत सार्वजनिक जागांचे व्यवस्थापन, पथदीपांची देखभाल-दुरुस्ती, भाजीबाजारातील वसुली व्यवस्था आणि नगरपरिषद कर्मचाऱ्यांना दिवाळी बोनस अशा विषयांवर चर्चा झाली.
कर्मचाऱ्यांना प्रत्येकी १० हजार रुपये सानुग्रह अनुदान
गटनेते मनोज देशमुख यांनी नगरपरिषदेच्या कर्मचाऱ्यांना दिवाळीनिमित्त सानुग्रह अनुदान देण्याचा विषय मांडला. या प्रस्तावाला जाधव यांनी अनुमोदन दिले. त्यानुसार कर्मचाऱ्यांना प्रत्येकी १० हजार रुपये दिवाळी सानुग्रह अनुदान देण्यासाठी आवश्यक तरतूद करण्याबाबत सकारात्मक भूमिका घेण्यात आली.
तीन विषयांना स्थगिती; दरपत्रके लावण्याचा निर्णय
खुल्या जागा संस्थांना देखभाल तत्त्वावर वापरण्यास देण्याबाबतचे तीन प्रस्ताव स्थगित करण्यात आले. सर्व्हे क्रमांक २७८/८ मधील जागा क्रीडांगण व उद्यानासाठी, ३३०९/४ मधील जागा शैक्षणिक व क्रीडाविषयक उपक्रमांसाठी, तर ९८१ (१२४०)/२ ब मधील जागा मंदिराच्या विकास, देखभाल व व्यवस्थापनासाठी देण्याबाबत चर्चा झाली. एलईडी पथदिव्यांच्या देखभाल-दुरुस्तीचा प्रस्ताव नामंजूर करण्यात आला.
भाजीबाजारात शेतकऱ्यांकडून कर वसूल केला जातो. शेतकऱ्याला कराची माहिती मिळावी यासाठी महत्त्वाच्या ठिकाणी दरपत्रके ठळकपणे लावण्याचा निर्णय घेण्यात आला. ठेकेदार किंवा संबंधित यंत्रणेकडून ठरलेल्या दरापेक्षा अधिक रक्कम वसूल केली जाणार नाही, यासाठी प्रभावी नियंत्रण ठेवण्याची सूचनाही करण्यात आली.
स्रोत: मूळ बातमी
Leave a Reply