सोलापूर शहरातील डॉ. बाबासाहेब आंबेडकर पुतळा परिसरात आंदोलने, धरणे, निदर्शने आणि घोषणाबाजी करण्यास बंदी घालावी, अशी मागणी धनगर समाज क्रांती मोर्चाचे महाराष्ट्र प्रदेशाध्यक्ष पवन पाटील यांनी केली आहे. यासंदर्भात त्यांनी मुख्यमंत्री, गृहमंत्री, सामाजिक न्यायमंत्री, पोलिस महासंचालक आणि जिल्हाधिकाऱ्यांना निवेदन दिले आहे.
पुतळा सर्व समाजाचे प्रेरणास्थान
डॉ. बाबासाहेब आंबेडकर यांचा पुतळा सर्व समाजाचे प्रेरणास्थान आणि श्रद्धास्थान असल्याचे निवेदनात नमूद करण्यात आले आहे. यापूर्वी जिल्ह्यातील आंदोलने, मोर्चे आणि उपोषणे जिल्हा परिषद आणि पूनम गेट परिसरातील अधिकृत आंदोलनस्थळी होत होती. मात्र, अलीकडे काही संघटना आणि व्यक्तींकडून पुतळ्याच्या पायथ्याशी आंदोलने केली जात असल्याचे निवेदनात म्हटले आहे.
अधिकृत आंदोलनस्थळीच आंदोलने व्हावीत
पुतळा परिसरातील आंदोलनांमुळे पुतळ्याचा अवमान होण्याची शक्यता असून वाहतुकीला अडथळा निर्माण होऊ शकतो आणि कायदा-सुव्यवस्थेचा प्रश्न उभा राहू शकतो, अशी भीती निवेदनात व्यक्त करण्यात आली आहे. परिसरातील शांतता भंग होण्याची शक्यताही वर्तविण्यात आली आहे. त्यामुळे पुतळा परिसरात आंदोलनांना मनाई करून जिल्हा परिषद किंवा पूनम गेट येथील अधिकृत आंदोलनस्थळीच आंदोलने करण्याबाबत आदेश काढावेत, अशी मागणी पाटील यांनी केली आहे.
स्रोत: मूळ बातमी
Leave a Reply