कऱ्हाडच्या मुख्य बाजारपेठेत सणासुदीच्या काळात गर्दी वाढू लागली आहे. शहरातील प्रमुख रस्ते आणि मुख्य चौकांत किरकोळ विक्रेत्यांनी केलेल्या अतिक्रमणांमुळे ग्राहक आणि वाहनधारकांची गैरसोय वाढली आहे. या समस्येकडे पालिका आणि शहर पोलिस दुर्लक्ष करत असल्याचे चित्र आहे.
अरुंद रस्ते आणि तासन्‌तास ठप्प वाहतूक
खरेदीसाठी दत्त चौक ते आझाद चौक, तेथून चावडी चौक, भाजी मंडई आणि शहरांतर्गत शुक्रवार व गुरुवार पेठेचा परिसर या मध्यवर्ती भागात गर्दी वाढली आहे. त्या परिसरात रस्त्यांच्या दुतर्फा बसणारे हातगाडे आणि किरकोळ विक्रेते यामुळे रस्त्यांचा आकार अत्यंत अरुंद झाला आहे. त्यामुळे मालवाहू आणि मोठी वाहने बाजारपेठेत आली की तासन्‌तास वाहतूक ठप्प होत आहे. आधीच अतिक्रमणांमुळे आकसलेले रस्ते आणि त्यात रस्त्यावर होणारी वाहनांची पार्किंग यामुळे दररोज वाहतुकीचा पुरता फटका बसत आहे.
तात्पुरती कारवाई, पुन्हा जैसे थे
बाजारपेठेतील वाहतूक कोंडी आणि अतिक्रमणे हटवण्यासाठी पालिकेची अतिक्रमणविरोधी तुकडी केवळ नावालाच उरल्याची टीका होत आहे. पोलिसांकडूनही वाहतूक नियमनासाठी ठोस कारवाई होताना दिसत नाही, असे स्थानिकांचे म्हणणे आहे. किरकोळ विक्रेत्यांवर कायमस्वरूपी कारवाई न करता केवळ तात्पुरते रस्ते रिकामे केले जातात आणि पथक जाताच परिस्थिती पूर्ववत होते. सणासुदीची गर्दी लक्षात घेता पोलिस व पालिकेने तातडीने विशेष मोहीम राबवून मुख्य रस्त्यांवरील अतिक्रमणे कमी करावीत, मोकळ्या जागावर चारचाकी वाहनांसाठी तात्पुरती व्यवस्था करावी आणि बाजारपेठेत मोठ्या वाहनांच्या प्रवेशासाठी वेळेचे नियोजन करावे, अशी मागणी कऱ्हाडकरांकडून होत आहे.
स्रोत: मूळ बातमी
Leave a Reply