यंदा पावसाने ओढ दिल्याने फुलंब्री तालुक्यात दुष्काळाची स्थिती अत्यंत गंभीर बनली आहे. खरीप पिके वाळून गेल्याने शेतकऱ्यांसोबतच शेतीवर अवलंबून असणाऱ्या शेतमजुरांच्या उपजीविकेचा प्रश्न ऐरणीवर आला आहे. शेतीकामे पूर्णपणे ठप्प झाल्यामुळे हाताला काम उरलेले नाही. परिणामी तालुक्यातील ३५ हजारांहून अधिक शेतमजूर कुटुंबे सध्या उपासमारीच्या छायेत असून शासकीय मदतीची वाट पाहत आहेत.
शेतकऱ्यांना मदत, शेतमजुरांना मात्र नाही
शासनाकडून शेतकऱ्यांना पीकविमा आणि नुकसानभरपाई दिली जात असली, तरी भूमिहीन शेतमजुरांसाठी कोणतीही स्वतंत्र तरतूद नाही. खुरपणी, फवारणी आणि कापूस वेचणीसारखी कामे बंद असल्याने अनेक कुटुंबांवर उदरनिर्वाहासाठी स्थलांतर करण्याची वेळ आली आहे. शेतीवरच पोट भरणाऱ्या या कुटुंबांसमोर दुष्काळात कामच उरले नसल्याने मोठे संकट उभे राहिले आहे.
काय मागणी केली जात आहे?
शासनाने दुष्काळग्रस्त शेतमजुरांचे स्वतंत्र सर्वेक्षण करून त्यांना तातडीने आर्थिक पॅकेज जाहीर करावे, रोजगार हमी योजनेअंतर्गत गावातच हक्काचा रोजगार उपलब्ध करून द्यावा आणि रेशनद्वारे अतिरिक्त धान्य द्यावे, अशी मागणी जोर धरत आहे. शेतकऱ्यांप्रमाणेच शेतमजुरांचाही विचार करावा आणि दिवाळीपूर्वी विशेष आर्थिक अनुदान जाहीर करावे, अशी भावना शेलगाव खुर्द येथील शेतमजुरांनी व्यक्त केली आहे.
स्रोत: मूळ बातमी
Leave a Reply