गोकुळ दूध संघाच्या अध्यक्षपदाच्या निवडीत मोठा ट्विस्ट आला आहे. महायुतीने सतेज पाटलांच्या समविचारी आघाडीचा अध्यक्ष होऊ नये यासाठी नवा डाव टाकला आहे. समविचारी आघाडीला 13 जागा मिळाल्या आहेत. मात्र अध्यक्षपदाच्या निवडीसाठी गणपूर्तीकरिता 14 संचालकांची आवश्यकता असते. हाच तांत्रिक मुद्दा पकडून महायुतीच्या सर्व संचालकांनी निवडीच्या बैठकीला दांडी मारली.
कोरमचा तांत्रिक मुद्दा
अध्यक्ष निवडीसाठी 14 संचालकांची गरज असताना महायुतीचे 12 संचालक गैरहजर राहिले. त्यामुळे निवड सभेचा कोरम अपूर्ण राहिला. अध्यक्ष निवडीच्या प्रक्रियेला यामुळे खीळ बसू शकते आणि महायुतीला पुढील रणनीती आखण्यासाठी पुरेसा वेळ मिळू शकतो. तसेच पडद्यामागे समविचारी आघाडीच्या काही संचालकांची फोडाफोड करण्याचे जोरदार प्रयत्न होऊ शकतात, असेही बोलले जाते. संचालक फुटले नाहीत, तर पुढील सभांनाही वारंवार अनुपस्थित राहून गोकुळवर पुन्हा प्रशासक राज आणण्याच्या हालचाली सुरू असल्याचे बोलले जाते.
एकतर्फी निवडीने शह
महायुतीने तांत्रिक मुद्दा समोर ठेवून ही रणनीती आखली असली, तरी सतेज पाटलांनी कोरम नसतानाही बहुमताच्या आधारावर शशिकांत च्युवेकर यांची अध्यक्षपदावर एकतर्फी निवड करून महायुतीला शह दिल्याचे बोलले जाते. यामुळे महायुतीवर नैतिक दबाव वाढण्याची शक्यता आहे. या घडामोडींनंतर मुश्रीफ यांनी वेगळा सूर आळवल्याचेही बोलले जाते.
गोकुळवर गेल्या सहा महिन्यांपासून प्रशासकराज सुरू आहे. त्यामुळे दूध संघाचे मोठे आर्थिक नुकसान होत असल्याचा आरोप संचालकांकडून केला जातो. पुन्हा प्रशासकाकडे कारभार देण्याविरोधात कोल्हापूरकरांमध्ये रोष वाढू शकतो. त्यामुळेच सतेज पाटलांनी एकतर्फी अध्यक्ष निवडीचा डाव टाकल्याचे बोलले जाते. आता या निवडीला महायुती आव्हान देणार की समन्वयाने घेत गोकुळला प्रशासकराजपासून वाचवणार, याकडे सर्वांचे लक्ष लागले आहे.
स्रोत: मूळ बातमी
Leave a Reply