जळगावात ‘सडक सुरक्षा मित्र’ कार्यशाळा, अपघात रोखण्यावर भर

जळगाव जिल्ह्यातील रस्ते अपघातांचे प्रमाण कमी करणे, वाहतूक नियमांबाबत जनजागृती निर्माण करणे आणि आपत्कालीन प्रसंगी अपघातग्रस्तांना तातडीने मदत उपलब्ध करून देणे, या उद्देशाने जिल्हा पोलिस दल आणि सेव्ह लाइफ फाउंडेशन यांच्या संयुक्त विद्यमाने दोन दिवसीय प्रशिक्षण व मार्गदर्शन कार्यशाळा पार पडली. या उपक्रमाचे नाव ‘सडक सुरक्षा मित्र’ असे आहे.

दोन दिवसांचे प्रशिक्षण, ६० पोलिस व विद्यार्थ्यांचा सहभाग

जिल्ह्यातील वाढते प्राणांतिक अपघात नियंत्रणात आणण्यासाठी आणि अपघातस्थळावर तत्काळ मदत उपलब्ध व्हावी, या संकल्पनेतून जिल्हा पोलिस अधीक्षक श्रीकांत धिवरे यांच्या मार्गदर्शनात या कार्यशाळेचे आयोजन करण्यात आले. अपर पोलिस अधीक्षक संदीप गावित यांच्या नेतृत्वाखाली २७ ते २८ ऑक्टोबर या दोन दिवसांत ‘झीरो फॅटॅलिटी डिस्ट्रिक्ट’ या संकल्पनेबाबत उपस्थितांमध्ये जागृती करण्यात आली.

या कार्यशाळेत जिल्ह्यातील विविध पोलिस ठाण्यांमधील ६० पोलिस अधिकारी आणि अंमलदार सहभागी झाले. त्यांच्यासोबत एम. जे. कॉलेज, रायसोनी कॉलेज, नूतन मराठा महाविद्यालय आणि त्रिमूर्ती इन्स्टिट्यूट (पॉलीमार), जळगाव येथील विद्यार्थीही उत्स्फूर्तपणे सहभागी झाले होते.

गोल्डन अवरचे महत्त्व अधोरेखित

कार्यशाळेदरम्यान तज्ज्ञांनी रस्ते सुरक्षा, वाहतूक नियमांचे पालन, अपघातावेळची खबरदारी तसेच जखमींना तातडीने प्राथमिक आघातोपचार देण्याबाबत मार्गदर्शन केले. अपघातानंतरचा पहिला प्रतिसाद, म्हणजेच गोल्डन अवर, वेळेत व योग्य पद्धतीने मिळाल्यास अनेक अमूल्य जीव वाचू शकतात, हे यातून अधोरेखित करण्यात आले. यावेळी सेव्ह लाइफ फाउंडेशनच्या प्राची व्यास, प्रियांकित पनवर, विवेक भुसे, शिवम सिंह तसेच आयसीआयसीआय लोम्बार्डचे नजीम खान आणि कपिल सिंग हे मार्गदर्शक म्हणून उपस्थित होते.

स्रोत: मूळ बातमी